Quela stagion de l’ano ti pol vedar in mi
co zale fogie, o nisuna, o poche, pìndola
da quei rami che intel fredo sgrissola,
nui cori desfai, dove gera oseleti e dolci canti.
In mi ti vedi un zorno al so tramonto
co, al calar de ‘l sol, zo a ponente sfanta,
e lo ingiote man drio man la note nera,
l’altra negra siera de la morte che tuto intela chiete sèra.
In mi ti vedi quel falivar de ‘l fogo
che se nìa intela cenare de la zoventù
cofà intel cusso, dove che se desmorsarà,
fruà de la stessa fiama che lo gà impissà.
De questo ti te gà inacorto, e xe el to amor più forte
tanto da amar co tuto ti chi te sbandonarà de boto.
(da Shakespeare alla veneziana, Santi Quaranta, 2012)
